大公網1月2日訊（記者 龔學鳴）政府公布會響西九文化區興建香港故宮文化博物館，不過反對派就不滿建館計劃事前冇作公眾諮詢，要求立法會內務委員會討論事件。身兼內會主席嘅民建聯主席李慧琼就話，政務司司長林鄭月娥將於今個星期五到內會解釋事件，期望會議能夠令公眾更加了解建館嘅內容。
李慧琼出席電台節目時話，預料星期五嘅內會會議會觸及興建故宮文化博物館嘅細節，包括香港同內地嘅備忘錄內容、公眾參與等社會關心嘅問題。佢又好歡迎建館計劃，除咗令市民可以近距離接觸國家文物，亦有助提升西九文化區作為區域樞紐嘅作用。
本港唔少熱愛中華文化嘅組織亦都對建館計劃感到興奮。世界華人收藏家學會、香港各界文化促進會等多個文化組織，成立「支持興建『香港故宮文化博物館』大聯盟」，認為有關計劃有助弘揚傳統文化，亦可以吸引遊客，改善經濟。 大聯盟今日會舉辦記者會，邀請一啲文化組織代表同埋收藏家分享感受。
