圖：林鄭月娥（右二）昨日下午到故宮博物館視察

　　政務司司長林鄭月娥尋日上京，準備出席今日下晝喺故宮舉行嘅一個文化項目簽署儀式。林鄭喺機場出發時就話，今日赴京唔會見中央官員，工作完全與文化合作有關。咁點解儀式今日下晝舉行，尋日早上就起程呢？林鄭就解釋，係因為尋日下晝要到故宮睇場地，同參與項目嘅故宮朋友研究下相關工作。

　　最近到北京出差嘅鄭晴，尋日下晝就決定碰下運氣，買飛扮遊客入故宮，睇下可唔可以成功巧遇林鄭，可惜行近活動場地─故宮博物院報告廳一帶時，就被保安攔住，話呢度係辦公地方，遊客唔可以隨便入去。正當萬念俱灰、準備離開故宮之際，鄭晴就發現遠處停泊住一架疑似林鄭坐嘅接待小巴，又見到一大群人從一棟建築物行出來，拿起相機當望遠鏡一睇，果然係林鄭！只見佢同身邊一位疑似係故宮人員嘅女仔交談，故宮博物院院長單霽翔亦喺隔籬，陪同林鄭嘅民政事務局常任秘書長馮程淑儀同康文署副署長吳志華，就攞住手機係咁影相，一行人之後又行入另一棟建築，無幾耐就上車離開。

　　200文物明年香港展出

　　作為慶祝香港回歸二十周年嘅大型活動之一，香港藝術館出年會同故宮博物院合辦「養心殿─故宮博物院文物大展」。養心殿係雍正以後清朝皇帝嘅居住同辦公地點，鄭晴尋日都慕名嚟到養心殿，結果發現養心殿仲係閉館復修之中，據悉館內200多項珍貴文物從未在北京以外地方展示，出年將會運到香港讓市民欣賞，大家真係有眼福啦！