唔知係咪不甘寂寞太耐，「民主阿婆」陳方安生尋日同傳媒茶敘時又出手亂點江山。佢回顧2016年，聲稱銅鑼灣書店、選舉確認書同人大釋法是今年發生最大事，話咁樣破壞香港法治喎！之不過宣誓辱華、旺角暴亂呢啲真正破壞法治同核心價值嘅嘢，佢就完全忽略，好似無發生過咁，催眠自己「睇佢唔到」囉。
講到特首選舉，阿婆就發揮指指點點本色，叫反對派嗰300幾票要捆綁投票，集中投一個候選人。佢更加「特別點評」政務司司長林鄭月娥，不停指林鄭畀人感覺係「獨斷獨行」。
陳太又急急同林鄭撇清關係，話林鄭從不是佢嘅下屬同朋友，亦都唔係「手袋黨」成員，仲踩多腳話對方「唔係好容易群隊嘅一個人，個性較為獨特」。對於另一位在預算案籌備最忙碌嘅時候辭職嘅財政司司長曾俊華，陳太就突然對佢讚不絕口。
係鄭晴失憶，定係陳方安生失憶呢？睇返2014年嘅報道，阿陳太曾經讚林鄭係一位能幹、敢作敢為同忠言直諫的官員，又話好多市民都認為對方係頗佳嘅特首人選噃。陳太如今咁擺明中傷，咩叫「反轉豬肚」，大家心照啦。
