梁振英到訪大埔舊墟，與同小學生一齊「割禾」。
大公網12月8日訊 （記者 龔學鳴）特首梁振英今早上去了大埔舊墟一間小學，唔係教種花，而係同小朋友一齊「割禾」，佢仲拍片擺埋上Facebook開心Share。影片中CY首先示範如何用鐮刀收割稻米，之後逐個逐個咁幫同學仔收割，不時大叫「好嘢！」鼓勵學生。佢又笑住話，其實割咁多都係煮到一碗飯咁大把，叫同學仔唔好浪費食物，因為「粒粒皆辛苦」啊！
CY中午又與同學仔同枱食飯，品嘗下自家收割嘅「成果」。隨後喺學校圖書館同50幾位來自四至六年級小學生對話。同學們圍住CY，不停問佢問題，由考試、房屋供應、基本法執行、填海增加土地供應、獨居長者照顧等樣樣都問，就連大埔停車位問題都關心，就連CY都忍唔住贊同學仔「思想活潑，對所提問題有認識」。
唔好以為CY淨係鍾意見細路，佢離開學校之後，下晝即刻轉場去東涌，同40幾位區議員、立法會議員、青年團體代表、校長老師、前線社工等離島社區領袖交流，了解當區房屋供應、跨境校網、大嶼山及離島交通等等需求；佢又鼓勵，各社區領袖用唔同方式拉近社會同青少年距離，等佢哋能有更多實習、就業和認識社會的機會。
