梁君彥約議員遊佛山/大公報記者麥潤田攝
大公網11月30日訊 聖誕節就嚟到，相信好多市民都諗住約埋三五知己聯誼一番，就連立法會主席梁君彥（Andrew）都唔例外，不過就慘食檸檬。佢今日回應傳媒有關議員回鄉證問題嘅時候自爆，自己早前曾經邀請議會同事「去附近嘅地方吃喝玩樂」，希望能夠增進大家嘅感情，但係就得唔到正面回應。
究竟因咩事連建制派都冷待Andrew嘅邀請呢？民建聯劉國勳透露，最近確實收到Andrew私下邀請，話希望約同事響今個月17至18號（星期六、日）去廣東佛山玩嚇，但自己由於公事繁忙，所以婉拒咗對方。佢話，自己作為「雙料議員」，平日已經用曬啲時間嚟處理議會事務，所以假日要把握機會落區，無辦法赴約。
