游梁「宣誓風波」後，反對派各陣營之間嘅對立似乎更加激烈。向來毫不客氣狠批「青政」兩人係「鬼」嘅民主黨立法會議員黃碧雲，佢嘅愛將、民主黨深水埗區議員袁海文就喺報章撰文，批評梁、游「不向法庭證明自己當日宣誓的有效性，其實就好似博球證畀紅牌驅逐離場，比浪費單刀黃金機會更離譜」，簡單嚟講，咪就係嫌呢兩個人累街坊。另一邊廂，游蕙禎尋日個人facebook咁啱地貼出一群白鴿地面啄食飼料嘅相片，話「唔好餵鴿啦……」，意有所指，寸味十足。似乎無議員做之後，都幾「游」手好閒。鄭晴睇住呢啲人「鬼打鬼」隔空互串，就真係食花生食到飽。
