因為「龜速」宣誓而導致官司纏身嘅立法會議員劉小麗，又再次出醜！話說尋日立法會政制事務委員會開會，討論兩個議程，分別係《本地報刊註冊條例》嘅收費調整，同埋2017年行政長官選舉嘅實務安排。劉小麗迫不及待舉手提問，要求政府交代選委會參選人被取消資格問題，要政制及內地事務局副局長陳岳鵬溫馨提示話，劉小麗條問題係關於下一個議程，仲未傾到噃。
「尊貴」議員唔記得投票
劉小麗知道自己「甩轆」，就托住腮、尷尷尬尬咁笑住話「我留返下次先問啦」。其實劉小麗已經唔係第一次「甩轆」，上任呢兩個幾月嚟，先有大會表決特權法查UGL事件嗰陣唔記得投票，之後又響保安事務委員會錯誤引述政府文件，聲稱政府打算設立禁閉營。希望劉小麗有返啲議員應有嘅質素，唔好再鬧出笑話喇。
