港燈與長春社合辦嘅「綠遊香港」生態旅遊節，首次由香港仔郊野公園移師到西環卑路乍灣公園舉行。為咗令街坊了解西區一帶不為人知嘅歷史，主辦方特登設計咗西區生態歷史旅遊路線，由尋日晏晝開始，每半粒鐘就有一班導賞團，由卑路乍灣公園出發，經過太白臺、青蓮臺、科士街石牆樹等有歷史故事嘅景點，並有生態導賞員講解。
鄭晴聽講，其實早喺2005年，港燈與長春社就已經合辦「綠遊香港」項目，先後開設咗八條「綠遊香港」生態文物徑，比如喺夏季夜晚走入索罟灣，用眼睛進行「地氈式搜索」，就可以發現螢火蟲喺黑夜中開緊party，或者去到大潭郊野公園欣賞碧綠嘅水塘群，聽一聽「水塘物語」。港燈董事總經理尹志田話，10年中已有超過9,000市民同佢哋一齊，暢遊呢八條生態文物徑，一同漫步於「城市後花園」，走進大自然，舒展身心。
