劉小麗呢排官司纏身，到底仲有無得做議員呢？就等法官裁定吧！之但係，佢仲有心情喺旺角街頭搞佢嘅「民主教室」，佢口口聲聲話有壓力，但仍然會堅持講「民主自決」，假如怯就會輸一世，一畀人打壓就跪低，只會輸得更多。佢仲話嚟緊呢幾個星期，仲會請唔同嘅嘉賓演講，擴闊大家對「民主自決」嘅想像喎。
鄭晴尋日路經旺角，咁啱就聽到呢番說話，佢講乜嘢「想像」先？「自決」等同「港獨」，後果真係不可想像至真，鄭晴點都想像唔到原來小麗老師咁厚面皮囉，唔怪得網民都叫佢做「小麗老千」。不過，現場所見，幾乎清一色都係六十歲以上嘅叔叔伯伯喺度「上堂」，有啲仲專登搵劉小麗影相玩「捕獲」！原來小麗老千係「阿伯殺手」嚟㗎，玩完「捕獲」，阿伯之後可能「好大鑊」！
既然呢班「老友記」咁「愛」小麗老千，咁佢就唔好唔記得當日嘅承諾，之前實牙實齒話捐出一半立法會議員薪金，同長者同甘共苦，又話將筆錢成立社企服務「老友記」。找咗數未先？嚟緊天氣轉冷，「老友記」怕凍㗎，小麗幫咗佢哋未呀？
鄭晴
