青年新政梁頌恆、游蕙禎終於唔再係候任議員，尋日《壹▉週／周▉刊》就出咗「梁游已完」嘅專訪。梁頌恆喺專訪提到，形容自己係商人與政治人之間，較似一個商人。喺城大工商管理系畢業嘅佢，自誇做學生會會長嗰陣幫學生會賺咗一百二十萬元，又好坦白話自己好功利。
但點解佢唔做「商業奇才」，反而做「政治庸才」？佢話呢個都係好功利嘅諗法，因為唔想要「一國一制」，而「一國兩制」又唔得，所以無咩選擇。佢仲話，以後都唔會再北上，因為「覺得生命受威脅」，仲話自己入「青政」之後，買咗意外保險，被人暗殺應該有得賠三百萬喎。梁生係咪睇得太多戲呀？拍緊《十月圍城2》呀？定係之前喺辦公室玩得太多《Assassin's Creed》呢？
至於游蕙禎，佢就話父母係退休公務員，佢哋唔係紀律部隊，亦都唔係同政制相關嘅部門。另外，佢喺《E▉週／周▉刊》專訪話，有成個月無返屋企，家人都唔理解佢做咩。好多網民就話，父母打政府工養大佢，佢居然反政府，侮辱中華民族，搞到立法會成個月都幾乎癱瘓，真係浪費納稅人金錢呀！梁、游快啲回水啊！
