圖：胡老闆話聽到梁游終於被判喪失議員資格後，益嚇街坊「買一送一」咁話/大公報記者林少權攝
犯眾憎梁游被取消議員資格（Disqualified，DQ），全城歡呼，有小店尋日更加推出「買一送一」慶「梁游已完」（右圖），咁新穎嘅優惠真係令鄭晴大開眼界！喺香港仔經營兩間麵店及一間壽司店嘅胡先生同鄭晴講，呢排日日返到屋企都聽到梁游嘅負面新聞，搞到佢個人都好唔開心，尋日聽到梁游終於被判喪失議員資格，餐廳員工即刻話要買嘢食賀一賀佢，佢於是靈機一動，貼出「買一送一」優惠告示，索性益嚇街坊咁話。
鄭晴尋日都去胡老闆兩間麵店及相鄰壽司店睇過，見員工做到無停手，胡老闆一邊忙住收錢一邊話，始終麵店座位有限，連同舖租、員工及燈油火蠟，40蚊一碗麵，預咗賣一碗蝕一碗，但壽司店明顯多咗好多外賣客人，存貨都清得七七八八，雖然預計全日要蝕過萬蚊，但都覺得無所謂，「當豪埋出去」，最重要係街坊開心。雖然優惠只能維持一日咁多，但係良心小店喺香港已經買少見少，值得街坊多啲支持！鄭晴話，市民更加期待優惠會陸續有來，如果稍後法庭決定DQ埋劉小麗，九龍西就真係「買一送一」啦，相信到時又要勞煩小鳳姐，香檳開到斷曬市！
