圖：《學苑》真係教壞人，搞到港大學生咩都咁激進，之前仲衝擊校委會會議

　　近年極惹火嘅香港大學學生會刊物《學苑》，最近又出嚟獻世。呢期又賣咩膏藥呢？鄭晴攞嚟一睇，嘩，全黑色封面，竟然好似想重演立法會宣誓風波中引起好多人反感嘅身披「Hong Kong is not China」藍旗相。睇真啲張相個背影，仲好似剛被搣柴嘅梁頌恆咁，鄭晴忽然想起，唔通真係「革命」上身？

　　打開本嘢，果然有篇《革命港獨勢難避免》，仲有《重新思考香港獨立理論》、《獨派的分離路》，唯一新嘢，可能係畀人「即炒」嘅前報章主筆練乙錚寫咗篇「雙贏港獨」，學足洗腦歌咁，全部都係「獨」。老實講，打從2014年二月號《香港民族命運自決》開始，《學苑》就大講什麼香港民族論，又話什麼「獨立建軍」，簡直係「獨」性不改，執「獨」不悟！

　　唔止咁，《學苑》仲愈講愈放肆，什麼《香港民主獨立》、《雨傘世代 自決未來》，今年八月號則是《帝國瓦解 香港解殖》。一年幾期《學苑》，幾乎係「港獨」不離口，一時話武裝，一時要起義。十幾個人組成嘅編委，係咪就代表咗港大萬幾個精英學生呢？

　　口水嘢毫無新意

　　不過，咁樣隔兩三個月就出一期講「獨」播「獨」專集，都咪話唔係洗腦，直情就係公然播「獨」。近年，部分港大師生屢借學術自由為名，搞「佔中」，播「港獨」，明顯危害社會啦。到底呢班精英腦子裏在想什麼？

　　鄭晴懷疑，佢哋係咪中咗毒呢？尤其《學苑》啲編委，滿腦子都係「武裝革命」、「武裝起義」，聽完真係笑大人個口啦，講嚟講去都係口水嘢毫無新意。其實，自2013年起，《學苑》就出咗《佔領中環 香港革命》啦。唉，有好好嘅學問唔做，無時無刻大喊「革命」、「港獨」，到底班人對香港和大眾有咩貢獻？唔通真係收咗人啲錢，要成日交功課？

　　鄭 晴