青年新政梁、游嘅宣誓風波發生咗，有一個核心人物從來無現身過，唔少人都開始問，「梁天琦去咗邊？」愈來愈多網民及支持者都開始關心「大佬」梁天琦嘅下落，不斷轟炸佢同「本民前」嘅fb留言「龜縮完未？」仲有話冇理由連大公文匯都搵佢唔到。鄭晴真係要多謝網民咁抬舉本集團！之但係「琦哥」可能實在無面目見香港人，有心潛水又點會咁易畀人搵到呢？
至於佢嘅「好兄弟」黃台仰，尋晚就繼續「死雞撐飯蓋」，話青政成功引爆「憲政危機」，算係「推動咗『港獨』嘅一小步」，「性價比絕對值回票價」，完美演繹「阿Q精神」。佢又話日前去西環堵路示威「上唔到前線，自己都非常過意唔去」，因為如果被捕會違反保釋條件，收押到2018年旺角暴亂案開審，屋企人代支嘅25萬元保釋金亦會「凍過水」。咦，當初又話「寧為玉碎，不作瓦全」、「無成本，又可以玩嘢，點解唔做？」而家你終於知驚？鄭晴奉勸「本民前」認清黃台仰呢個「假鬥士，真小人」，真係「信你一成，雙目失明」！
