圖：民建聯一眾男議員都齊齊選用淺藍色民記會呔/大公報記者何嘉駿攝
新一屆立法會昨日召開首次大會，記者發現，不少議員喺履新日都換上新裝。平時衣着以素色衫為主嘅民建聯主席李慧琼就着住粉紅色西裝褸，襯埋白色蕾絲裙同裸色高跟鞋，令人眼前一亮。新民黨主席葉劉淑儀和民建聯葛珮帆都選擇咗紫色外套，葉太更襯上一條白色底嘅碎花連身裙，非常搶眼。對比之下，反對派嘅女議員着衫就多以沉色為主，重返議會嘅公民黨陳淑莊一身黑裙，再加上黑色眼影和深紅色唇膏，鄭晴就覺得，呢set似係萬聖節裝束多啲囉。
女議員着衫選擇多，男議員就紛紛喺呔度落工夫，民建聯一眾男議員都齊齊選用淺藍色民記會呔，但梁志祥就着住中山裝，所以無打呔。還有多位男議員選擇紅色呔，醫學界新議員陳沛然就一如既往打住鮮綠色呔，都幾搶鏡。不過，有幾位男議員應該係髮型gel得太勁，記者第一眼差啲認唔出添。
