圖：民記前兩日拉大隊去會展睇「創科博覽二○一六」
現今科技日新月異，中國的創科技術更加可謂突飛猛進，之但係各位讀者究竟識幾多呢？民建聯尋日出咗條新片，訪問咗幾位市民「蛟龍號」係乜，中國航天飛船又叫咩名？之不過，好多人都似乎講唔出啲名，仲要將神舟一號飛船變咗「嫦娥」添！鄭晴都忍唔住講句，中秋節過咗喇，「嫦娥」係衛星唔係飛船呀。但係唔識都唔緊要，民記就建議你去「創科博覽2016」補補腦，增廣見聞。
原來，民記前兩日拉大隊去會展睇「創科博覽2016」，睇曬八個展區聽埋專家詳細解釋各項頂尖科技。民建聯主席李慧琼（Starry）話，六十幾樣展品之中三十三樣都係真嘢，至鍾意就係做微創手術嗰個機械人，覺得佢好有建設性，因為用機械做手術可以減低傷口擴大嘅機會，令病人無咁痛苦。
民建聯副主席周浩鼎（Holden）就話，見到好多學生參觀科技博覽就覺得好興奮，佢話，因為好多年輕人都對國家嘅科技唔太了解，希望呢個博覽會可以勾起佢哋對創科嘅興趣，令將來香港喺國際同國家創科發展上佔一席位。嗱咪話鄭晴唔提你，查實創科博覽只係得返今明兩日，頭先答唔到問題嘅人記得好快啲去惡補下啦！
