大公網訊 (記者龔學鳴報道) 今日香港打十號風球，不過工黨內部都撞正十號風球喎。話說今日工黨突然宣布，胡穗珊辭去主席以及退出工黨，工黨執委曾經勉留，但最終尊重佢決定。而家工黨由黨務副主席兼青年部主席趙仕信擔任，直至年底換屆時選出新一任主席。
胡穗珊事後接受傳媒訪問就話，今次退黨係因為黨內有架構問題，喺處事方面非常唔公道，唔合乎一個講公義嘅政黨用嘅手法，加上自己喺黨內長期受到不公平對待，所以退黨係一個抗議喎！佢又話今次退黨唔涉及對工黨路線睇法有意見，當初做主席已經有問題，但諗住睇定啲，但上個月已經惡化到人係可以影響到架構既公正性，又話唔關立法會選舉同補選事喎。另外，趙仕信就話，大環境氣氛低迷，打擊就一定有，但只有盡做。
今次事件，再一次反映反對派政黨係相當兒戲，工黨係咪為市民着想，市民已經喺立法會選舉用選票證明咗啦！三個人參與直選，得一個當選。而今次胡穗珊一句話黨內不公平不公義，就可以話走就走，有無責任感呢?大家可以自己定奪。不過，經歷過民主黨林子健事件，大家就唔好跟車太貼啦！始終都係得胡穗珊一個人自己講，話唔定另有內情呢！
