圖：舊式的店舖多用「摺閘」；遇上結業，那不就是「摺埋」了嗎？

　　「埋」有「葬」的意思。「葬」就是死了，生命有個了「結」，什麼也塵埃落「定」，亦即一「了」百「了」。那廣東人所用的「埋」字也有以下的意思：

　　定、結、了

　　據此，廣東人創造了不少相關的粵語方言用詞：

　　「話唔埋／講唔埋」，相當於說不定。

　　例1：失戀啫，唔使唔開心嘅，「話唔埋」聽日你識番個靚女呢！

　　「三日唔埋兩日」，指三日不定兩日也不定，相當於「三天兩頭」，用以形容經常發生的事。

　　例2：呢對拖友（戀人），三日唔埋兩日就嗌分手。

　　「三句唔埋兩句」，相當於經常把某些話兒掛在嘴邊，與「開口埋口」意近。

　　例3：你有冇文化㗎，三句唔埋兩句就爆粗！

　　「埋數」，相當於結算。

　　例4：我公司逢廿八號埋數。

　　「埋單」，相當於結帳，也有最終負全責的意思。

　　例5：你喺外便做咗咁多唔負責任嘅嘢，最終可能要屋企人同你埋單！

　　「執埋」，相當於「執笠」，即結業。

　　「摺埋」，其實係由「執埋」通過以下的音變而來：

　　執（zap1）；變韻母zip1；變調摺（zip3）

　　由於「死亡」可看成「人生結業」，所以有人以「摺埋」寓意死亡。

　　例6：生意唔好，老闆決定今個月底執埋／摺埋間酒樓。

　　「凍到面都紅埋」，指因天氣太冷，凍得臉部通紅了。

　　例7：今日原來得一度，唔怪之得個個凍到面都紅埋。

　　「嚇到腳（仔）都軟埋」，指因受驚過度以致雙腿發軟了，意味着行不動了。

　　例8：如果半夜三更響山頭野嶺度有人同我打招呼，我肯定嚇到腳都軟埋啫！

　　「做到／行到腰都直埋」，指因工作／行路太多，令到腰部極度疲倦。人累時或坐／站得太久，會站着伸伸腰，廣東人叫「伸懶腰」；伸腰時，腰被拉直了，於是有「腰都直埋」的講法。「梗」有「直」的意思，因而也可說成「腰都梗埋」。

　　例9：年尾公司好忙，全人類都做到腰都直埋。

　　「火都嚟埋」，指火也來了，比喻因被激怒或看到一些極度不滿的事物以致怒火中燒。

　　例10：個仔話極都唔聽，搞到個老竇火都嚟埋。

　　【「粵語方言用字：埋」之十一】

　　香港資深出版人 梁振輝