正所謂「年紀大、牙齒壞」，「二叔公」吃硬東西應不太行了。然而，芋頭「『鬆』化」，「二叔公」便可開懷的吃完一個又一個，即「『鬆』下一個，『鬆』下又一個」了。粵語中，「鬆」指溜走，情況便變成「走下一個，走下又一個」，而這也可理解為不斷有人從某個單位離開或去世，於是有以下一個與二叔公「身體狀態」相關的歇後語：

二叔公食芋頭─鬆下一個，鬆下又一個

　　示例1：

　　呢間茶記個老細尖酸刻薄，班夥計咪好似「二叔公食芋頭」咁，「鬆下一個、鬆下又一個」囉！

　　示例2：

　　我哋呢班晨運客，個個八九十歲，耐唔時就「二叔公食芋頭」，「鬆下一個、鬆下又一個」，都睇化曬嘞！

　　農家有句諺語「雞司晨，狗守夜」，意思是雞和狗各在不同時段執行其職務。由於狗是養來看門口的，所以在夜間不能睡，還須留意四圍動靜。一有什麼風吹草動，狗兒就會大聲吠叫，除讓屋內各人知道外，也可嚇退那些鼠竊狗偷。舊時民風純樸，基本上可做到「夜不閉戶」，所以夜半的「狗吠聲」應不是出現了什麼狀況。「二叔婆」於是這樣教導狗兒：天一黑就盡情吠叫，吠完了便安心去睡。當然這個做法也可令「二叔婆」的清夢不致被打擾。

二叔婆教狗—早早吠都好瞓

　　「都好瞓」的意思是便可以安心去睡覺。此歇後語具雙重意思，其一用以形容對本職工作敷衍了事的行為；其二用來建議某人須盡快完成手頭工作以便開啟下一件工作。

　　示例3：

　　母：阿仔你三扒兩撥做曬啲功課，咁同「二叔婆教狗」冇分別！

　　子：阿媽，呢棟大廈唔准養狗個喎，點教狗呀？

　　母：我係話「早早吠都好瞓」，即係話你求求其，做完了事。

　　子：阿媽，我冇唔認真，只係快快手手做完，然後可以專心去溫書啫！

　　母：阿仔，咁阿媽真係怪錯咗你嘞！不過都算係「早早吠都好瞓」！

　　子：又用番呢句！

　　母：今次係話你快手做完呢樣然後就可以安心去做第樣啫！

　　子：一詞兩解，又學到嘢嘞！

　　【「二叔公」之七】

　　香港資深出版人 梁振輝