所謂「物離鄉貴，人離鄉賤」，真係為計劃通過BNO護照去英國班人捏把汗。移民並唔係「黃絲」KOL口中講得咁簡單，仲要考慮好多當地因素，否則一步錯就後悔一生。呢啲真係鈔票換護照，講金不講心囉!宜家英國失業率、裁員人數屢創新高，唔少港人英文水平不足、對當地文化了解低，搞到搵唔到工，經濟更係陷入拮据。更加令到赴英港人求助無門，甚至錯信「朋友介紹」，畀人呃錢，都呻「貼錢買難受」，抵埗冇耐已經後悔莫及，睇嚟打退堂鼓返嚟香港就係佢哋嘅唯一出路囉!

英國早前因應經濟蕭條，減免物業印花稅救市，至下月底結束，唔少想移民英國嘅「黃絲」卻以為有着數，雞咁腳過去買樓，隨時貪字得個貧，畀人當做「水魚」，有網民咁話：「貪心總是容易畀人呃!」唔少「手足」仲嫌棄英文差嘅「黃絲」，話唔值得幫。「Jade Chan」話：「用自己『信用』亂推薦，如果條友爛泥，英國人一定認為成個香港組群係靠關係嘅垃圾囉，係lose lose呀!」「Nat Li」都話：「搞到好似做社工幫輕度智障嘅患者搵工咁。」「TeRry Tang」就慨嘆：「各家自掃門前雪。」講到尾，宜家放寬移民門檻都不過係「趁火打劫」，目標始終係香港專業中產，所謂「手足」都係陪襯嚇、用嚟攞嚇光環嘅啫。