香港人工時長堪稱冠絕全球，加班是常態，更隨時要被老細WhatsApp疲勞轟炸！工聯會昨日公布調查，半數受訪打工仔在下班後和公餘時間，經常收到上司的WhatsApp等即時訊息，較2015年調查時只佔24.5%大增。鄭晴聽到都覺得誇張，即是每兩個打工仔就有一個肉體可以放工，精神就「冇得收工」！

　　小中產：凌晨四點都即覆

　　「半夜四點send嚟都有！」工聯會香港文職及專業人員總會副會長陳勇華任職金融業，顧客便是老細，「閒閒哋」一日收逾百個訊息，但想到「自己只係中產，小朋友得幾年級，要為生活打拚。」不得不馬上回覆。「成日做低頭族，都影響家庭關係。」他希望僱主正視問題。

　　總會近月以問卷訪問了502位打工仔，15%人稱每周工作55小時以上，五天工作計，日做逾11小時。53.2%人經常加班，22%人平均每日加班逾兩小時。WhatsApp、WeChat、Line等即時通訊軟件興起，逾半數打工仔更加「冇得收工」，隨時收到上司透過即時通訊軟件發的工作指示，當中七成人坦言生活受嚴重困擾。

　　重災：個人助理24小時待命

　　鄭晴問哪些職位是「重災區」？安俊人力資源顧問董事總經理周綺萍說，首推個人助理，差不多24小時收老細WhatsApp，而且一定要回覆，「通常這些人做幾個月就走，頂多一年就唔做。」不過，一般崗位不會如此嚴峻，除非有項目在身，而且老細放工後發WhatsApp，「很多時只係驚自己唔記得。」她認為最重要「平時大家有溝通，講明呢樣工作唔使即時做。」

　　她又溫馨提示，員工放工後仍收WhatsApp指示，缺乏休息，最終影響公司效率，奉勸僱主「適度有為」！呢句打工仔至啱聽！