圖：左起：Michael、阿Ching及Derek創立的「iSEE」，由手機應用程式App發展至今，還會為企業機構提供無障礙服務支援

　　創新科技方興未艾。四名90後年輕人馮廣照（Michael）、譚皓元（Derek）、雷健青（阿Ching）及潘展宏（John），為了幫人而合組創立手機App初創企業「iSEE」。Michael家貧自小興趣做義工；Derek單親家庭長大，自小被當「人球」到處寄居。他們的成長經歷，對社會弱勢社群有較深刻體會，故大學畢業後，希望透過一己之長，為弱勢社群「做啲嘢」。「社會爭拗多，我哋覺得少咗份『同理心』，希望為社會發出正能量。」

　　今年27歲的Michael與25歲的Derek是他們創立的初創企業「iSEE」兩大骨幹成員，兩人就讀沙田同一間中學，雖然不同級別，但因為同被選中成為學校乒乓隊成員而互相認識。「當年我哋唔算得上老友，但Michael鍾意幫人同關心時事嘅性格，令我一直好想同佢做朋友。」Derek說。

　　Michael在沙田美林邨長大，他以「十分家貧」形容自己的童年。「同我同年紀嘅朋友，佢哋大部分有遊戲機，將大部分時間花喺打機，但我未曾有過遊戲機，所以我嘅娛樂，除咗落樓下嘅石波枱打乒乓波外，就係做義工打發時間。」當年，幾乎所有由區議員或屋邨互委會舉辦的義工服務，他都會參加，正因如此，他漸漸關心社會弱勢。「有時覺得自己好慘咩！其實社會仲有好多人慘過我，所以我立志要為佢哋（弱勢社群）做啲嘢。」

　　中學留意各地社企服務

　　Michael就讀中六那年，特別留意世界各地不同社企服務狀況，並申請資助，赴台灣了解當地的社企服務，同行的還有師弟Derek。「當年搵Derek，係因為覺得同佢啱傾，大家都關心時事同社會服務。」

　　原來，Derek的童年也甚為波折，令他深深感受到作為社會弱勢的無助感。「我自細父母離異，之後，我嘅人生就好似人球一樣，被人踢來踢去，一時住A親戚屋企，一時住B親戚屋企，住到連自己都唔知邊度打邊度！」有社工跟進Derek個案，他亦順理成章認識不少弱勢社群。當中多名後天失明及患有嚴重弱視的朋友，對他影響尤深，「其實好多後天失明或弱視嘅朋友係唔識凸字㗎，佢哋主要靠聲音同觸摸去辨別客觀嘅世界，但社會喺呢方面嘅支援好少。」

　　Derek舉出兩個例子說明，其一是友人搭時因未能確認那個層數的按鈕向保安員求助，結果被大罵；另一則是友人在快餐店因走得太「埋」看餐牌，結果被誤以為「打尖」遭喝罵。Derek指，從外表看，弱視人士與正常人基本沒有分別，然而他們因身體不同程度的殘障，處處碰壁。

　　當離開中學後，Michael與Derek各有發展，Michael在公開大學修讀電腦，畢業後受僱軟件工程師，負責應用程式App的設計與撰寫工作；Derek則在嶺南大學社會科學系就讀，去年畢業。

　　然而，他們那份要幫助社會弱勢的心，始終沒有熄滅，並在2016年年中，當Michael已在職場打滾兩年後，付之實行。「嗰陣時我每日由朝到晚返工放工不停寫程式，賺錢幫人優化App內容，但我諗，點解我唔可以用我專長去幫助社會有需要嘅人呢？」因為這份決心，Michael找來大學同窗阿Ching，以及Derek與他的大學學弟John四人合組社創企業「iSEE」。

　　便利視障者日常生活

　　初時，「iSEE」為長者及視障人士發明手機應用程式，便利他們日常生活，包括工作、社交、旅遊與生活所需，希望手機鏡頭幫助他們提升視力，其發明獲得社創基金十萬港元資助。隨着需求的變化，他們最近已將業務增強，除發明App外，還會為企業機構客戶提供無障礙網頁檢測及服務支援，以確保網頁符合國際通用的無障礙標準，協助包括視障群體在內的傷健人士融入社會。

　　Michael坦言，離開穩定且具有前途的軟件工程師工作，不是為錢，而是為了一份同理心，希望可以為社會做得更多。「其實社會目前對弱勢社群嘅支援仍然不足夠，我希望用我專長去改變佢，而我專長係電腦同手機軟件嘅研發工作，我只能用呢樣嘢幫人，就係咁簡單。」