圖：波哥話「主席指引」係符合法律要求
財委會主席陳健波早前就話將會推出「主席指引」，即係將同日會議視為同一次會議，被趕議員同日唔可以返回會議室，同埋議員提出縮短表決鐘聲動議時，議員發言時間由三分鐘減至一分鐘。
波哥尋日話，會喺今個月17號或者23號召開交流會，邀請立法會議員出席交流，到時立法會秘書長同法律顧問都在場。呢次交流會唔係諮詢，目的係希望收集議員意見，同埋釋除議員疑慮。如果議員有理據嘅，佢可以作出相應修改，但如果唔使改，相信一兩日就可以執行「主席指引」。波哥又話，「主席指引」係符合法律要求，如果執行後有人不滿，可以提司法覆核喎。如果同反對派達成共識，最快可以本月19號執行。
民主派會議召集人莫乃光就擺出一副唔合作嘅姿態，話反對派唔贊成交流會，揚言會用唔同方法阻止陳健波硬推喎。老實講，反對派嘅講法根本站不住腳，執行主席指引都係想會議暢順啲，舊年縮短表決鐘動議，嘥咗財委會接近六個鐘。呢啲唔係「拉布」，係咩呢？
