圖：「狗易樂」畫展展出超過30幅以狗為題材的大型油畫，冀更多人加入保護狗隻行列
尋日係世界愛犬節，因為「926」諧音「狗易樂」。世界愛犬聯盟舉辦咗一個「狗易樂」畫展，展出超過30幅以狗為題材嘅大型油畫。其中一幅名為「盤中飧」嘅畫作，餐碟上一塊肉扒酷似狗隻形狀，左右是一刀一叉，諷刺隻「人類最好嘅朋友」竟淪為盤中飧。
主辦單位話，聯盟舊年推動英國國會討論2018年韓國冬季奧運會及禁食狗肉嘅簽名活動，呢幅畫就引起廣泛共鳴，獲得了10萬英國人嘅簽署，後來英國同韓國磋商，韓方最終取締咗當地最大嘅狗肉市場。韓國總統文在寅仲收養咗一隻狗狗添。另外，《打牌》一畫，十隻狗圍埋一圈打牌，神態各異，有狗仔仲換牌「出貓」，活靈活現，展示咗狗仔靈性嘅一面。
「人有好人壞人，狗無好狗壞狗」，呢句係今次油畫作者、聯盟創辦人玄陵嘅口頭禪。佢話，好多人會唔想見到有關狗隻殘忍遭遇嘅照片，油畫作品就可以避免呢啲畫面，更好咁畀人接受。佢未來仲希望喺國外都舉辦有關大型畫展，使更多人一起加入保護狗隻嘅行列，令人類同自己最好嘅朋友可以更和諧咁相處。
