大公網9月7日訊：每兩年一次嘅「公務員優質服務獎勵計劃」尋日係會展舉行頒獎禮，一共有19個部門嘅39項服務獲獎，奪得10個獎項嘅警務處成為大贏家。主持頒獎禮嘅林鄭月娥致辭時，特別讚揚消防處、警務處同渠務署三個部門，例如四名消防員係颱風「帕卡」吹襲當日，救出兩位行山被困人士，非常敬業，彰顯人性嘅光輝，在場嘅消防處人員更係林鄭嘅提議下站起身，接受全場嘅掌聲。 

　　林鄭又笑稱警務處多年都獲得「最佳公眾形象獎」銀獎，顯示佢哋唔怕被抹黑，不過就好難拿金獎喇，因為消防處嘅「烈火英雄」形象太深入民心，連佢當年做社會福利署署長時，部門都比唔過消防處，只係拿過銀獎咋。林鄭又話，自己對問責團隊嘅要求係創新、互動同協作，同樣適用於公務員團隊，希望每個部門都有熱情、承擔、同理心嘅精神，主導政策推行。佢形容，政府上任兩個幾月嚟，同公務員團隊合作良好，期望能做到「議而有決、決而有行」，未來問責團隊會檢視行政模式，減輕公務員壓力。 

　　消防處今次其實都好威，拿咗八個獎項，其中佢哋為救護員引入骨內注射腎上腺素技術，同埋成立潛水特救隊，支援屯門至赤蠟角連接海底隧道施工所需嘅緊急服務，分別獲得「部門精進服務獎（大部門）」及「隊伍獎（專門服務）」嘅金獎。消防處呢支潛水特救隊，仲係全世界第一支公營潛水救援隊，28名人接受四年嘅額外訓練，裝備方面用咗全球首創嘅陸海兩用閉路式循環潛水器，可供四小時搜救行動。