大公網9月6日訊：中文大學日前開學，校園民主牆被貼滿宣傳「港獨」嘅單張。一名內地女學生出於義憤打算移除單張，點知遭到中大學學生會幹事會外務副會長朱安妮同內務秘書杜浚銘嘅阻撓。女生用普通話表示，聽唔明兩人嘅廣東話，朱安妮就用英文辯解，結果遭女生用流利英文霸氣回應：「如果你講民主，你可以貼上去，我也可以移除，你說你是代表中大學生，但我也是學生之一，我不同意（港獨）這件事！」 

　　朱安妮續以英文回應，只不過就變到口窒窒，講來講去都凈係識講：「這是我們學生會管理的民主牆……」。女生就反擊：「誰賦予你權力去做，是學生嗎？」朱安妮先話唔係學生授權，而是學校，不過杜浚銘就亂噏係學生授權，兩人口徑不一。朱安妮之後就改口話係「學生和學校」，睇來學生會對自己嘅職權都搞唔清楚。女生又不滿學生會對她進行拍攝，但朱安妮好似聽唔明，答非所問，好似錄音機咁重複話「你不可以這樣做」，當場出醜。而杜浚銘更衰，全程講咗幾個英文單字。 

　　有關片段係網上瘋傳後，唔少網民都揶揄朱安妮同杜浚銘作為大學生，英文仲係「小學雞」水平，內地女生「單係英文都贏曬啦。」網友「Tanri Ling」留言稱：「內地學生已超越香港學生好多，香港大學生應該好好檢討下！唔好再搞咁多政治啦！」