香港今年先後受四個八號或以上颱風吹襲，天文台台長岑智明（圓圖）近日喺Facebook發帖回顧上月天氣時，上載咗一張相，記錄自己喺「天鴿」襲港時，發出2011年上任以來第二個十號波，形容係歷史時刻。佢回應網民時仲透露，自己當日連續40個鐘無瞓覺！鄭晴都想講句，今個夏天，真係辛苦曬台長。
咪睇小簡單嘅一張相，有網民從中解讀無限玄機，例如台長宣布懸掛十號風球，並非傳說嘅用紅筆填form（表格）簽字發出，而係喺電腦輸入密碼，相片內仲泄露咗個密碼添！不過智明台長話，密碼只用一次，唔使擔心，佢仲講笑話，「（當日）同事準備好（資料）後，我嘅任務就係核對同入密碼發出。」下次不如試嚇用紅筆填form？講嚇笑好喇！領略過十號颱風威力後，大家都嚇餐飽喇。
