左起：吳啟楠、梁錦松、譚志源（大公報記者龔學鳴攝
大公網9月5日訊（記者 龔學鳴）前政制及內地事務局局長譚志源（Raymond）早前離開服務咗30年嘅特區政府，加入新風天域集團。新風天域董事長梁錦松今日就帶埋Raymond同埋首席執行官吳啟楠出席記者會，簡介集團未來發展路向。
梁錦松透露，早於Raymond今年公開表示唔會留任特區政府嘅時候，自己已經有向對方介紹新風天域嘅業務，並響7月正式邀請對方加入，協助發展內地教育同醫療業務。被問到二人嘅步伐係咪一致，梁錦松話，「唔會有一個人同另一個人係完全一樣」，期待Raymond能夠為集團帶入新思維解決問題。
梁錦松當年擔任財政司司長嘅時候，Raymond係佢嘅新聞秘書。Raymond笑言，當年同梁錦松「合作得好好」，而自己尋找「第二事業」嘅時候都遇到唔少公司向佢招手，但係自己考慮嘅時候「好揀擇」，經過多次溝通，佢認同新風天域嘅理念並選擇加入。佢又話，希望未來能夠擔任香港同內地之間嘅橋樑，同埋為國家服務。
