圖：梁偉明指高鐵從班次到價錢都富吸引力\受訪者提供相片
廣深港高鐵香港段喺明年第三季通車，第日返內地做嘢同去玩就更加方便快捷。就連經常到內地農村為貧苦學生教學嘅梁偉明都話，日後唔使過關後先去深圳北站，就可以直接喺香港坐高鐵，慳返好多時間，可以改善內地教育之餘，仲多咗時間陪下屋企人。
58歲嘅梁偉明曾經係小學校長，但佢為咗協助內地貧苦學生，十多年前毅然辭任校長，創辦咗《閱讀．夢飛翔》文化關懷慈善基金，為湖南省農村學校建立圖書館。
十多年嚟佢一直飛來飛去穿梭兩地，但自高鐵湖南至深圳段開通，佢就鍾意坐高鐵啦。點解？佢話「坐高鐵果幾個小時可以走動，仲可以開電腦處理文件，坐飛機就唔得啦。」佢仲話飛機成日delay，又要花時間安檢、提前到機場，加上高鐵班次、價錢吸引，自然就成為佢嘅北上首選啦。不過，而家佢仲要先過關到深圳北站，再轉乘高鐵到湖南，但日後高鐵香港段通車後，就可以直接喺香港坐啦，仲可以慳返好多時間喺香港陪下老婆。
