圖：就係呢位先生幫朋友投咗個「9413」車牌\大公報記者林少權攝

　　今日農曆七月十四，係俗稱「鬼節」嘅盂蘭節，鬼節前夕，有件咁嘅事喺車牌拍賣會發生：諧音「九死一生」嘅無字頭車牌「9413」，「驚現」運輸署傳統車牌拍賣場上，底價一開，全場嘩然——驚，係因為拍賣官開價九萬八，同場其他無字頭車牌，底價都只係八萬五、八萬九咁上下，個價邊鬼算平，所以開價十幾秒都無人承投，拍賣官差啲就要收返，最後數三聲，三、二，終於有人舉牌，喺無競爭下，呢位男士就以底價成功投得！

　　傳說沖噩運 博谷底反彈

　　呢位「神秘男」唔肯透露身份，話自己無車，係幫朋友投，對呢個車牌吉唔吉利無感覺。咁有無勸朋友唔好投呢？佢反問喺現場追訪佢嘅記者：「你朋友想做嘅嘢，可唔可以勸佢？」

　　優質幸運車牌中心負責人顏文翰同鄭晴解釋，行內叫呢啲做「極地車牌」，有人行緊衰運時，可能會想用呢種車牌幫手轉運，求谷底反彈，又話「9413」諧音可以係「搞笑一生」喎！佢又話，無字頭車牌一向較少有，底價通常都八、九萬，佢認為今次開價唔算特別高，如果有靚「冧巴」好似「8」、「9」類，仲會破十萬。

　　怪力亂神嘅嘢無從考究，不過鄭晴翻查資料，九萬八係「9413」自2001年推出以嚟嘅最高底價。唔起底唔知，「9413」已經係第六次現身拍賣會，2009年第四次拍賣時，第一次有人舉手投，底價四萬五。