圖：片中見到一口氣Rap出各莊員職務，非常有才華
「你有freestyle嗎？」唔好以為得歌手先有freestyle，家下連中學生都好有freestyle，唔止識Rap，仲拍埋MV宣傳！
話說近排Facebook上有一段MV熱播，兩、三日已經有成50萬人瀏覽，唔係咩天王巨星，而係屯門保良局董玉娣中學新學年學生會候選內閣之一「Pixel」拍攝嘅宣傳片，介紹內閣會長、副會長，以至康樂、文宣等崗位17名成員。
網民讚好：屯門之光
片中由會長趙文浩同孖生細佬趙文浚，一口氣Rap出各個莊員職務，雖然有啲動作比較生硬，但填詞加埋配樂，仲有剪接等等，簡直係世界級，非常有才華！此片一出，有唔少網民留言讚好，有人留言大讚話「又一條片流傳後世」，亦有網民讚各位同學係「屯門之光」！
之所以有今次意念，趙文浩同傳媒講，全因為細佬睇過內地真人show《中國有嘻哈》後，就隨口提議話不如拍條MV Rap嚟介紹，估唔到就係呢一句，令「Pixel」一夜成名。
