圖：金鐘政府總部對出嘅添馬公園，就有得睇風雨蘭啦 大公報記者蔡文豪攝
颱風過後賞花海？我見過！我鄭晴真係見過！「天鴿」、「帕卡」兩個颱風上星期先後襲港，市內多處塌樹，遍地殘葉樹枝。事隔三日，有啲地方仍然滿目瘡痍，但生命力頑強嘅風雨蘭，正正就喺滂沱大雨過後開花。絕處逢生，花海展現，有網民大讚「靚過北海道（賞花）呀！」
風雨蘭其實係蔥蘭同韮蘭嘅合稱，事關佢哋夏季期間，經常喺大雨過後開花。由於佢哋外形同百合花相似，所以又稱為雨百合（Rainlily）。但大家千祈唔好誤會，咪以為風雨蘭有個「蘭」字就係蘭科植物，其實蔥蘭同韮蘭同屬石蒜科植物。
梅窩都有得睇
等鄭晴再教你哋細分喇！蔥蘭花朵一般以白色為主，葉較圓，直立而少彎曲；韮蘭就多以粉紅色為主，花朵體積亦較大，葉就較寬易彎曲。邊度有得睇？近近地，位於金鐘嘅政府總部對出嘅添馬公園，就有得睇啦，想睇多啲嘅，假日到梅窩酒店附近兜一轉！
