圖：無花無假，麒麟臂上紋有「劉慧卿」
有網民喺「LIHKG討論區」分享咗一段2013年嘅外國健身短片，片中有個大隻佬展示手臂紋身時，驚現民主黨前主席「劉慧卿」嘅繁體中文名。短片立即喺網上瘋傳，至今有逾173萬人睇過，超過1.3萬人讚好。由於事件太離奇同搞笑，引起網民無限推測，有人仲話反對派一直「勾結外國勢力」，呢個唔通係卿姐嘅「秘密男朋友」？
或Google翻譯太勁鬧笑話
卿姐接受傳媒訪問時，就話唔識大隻佬，認為可能有另一個人同佢連名帶姓咁撞名。不過就有網民猜測，呢個可能係英文翻譯做中文時鬧出嘅笑話，洋人大隻佬嘅女朋友可能叫Emily，經Google翻譯輸入「Emily」時，就會發現對應嘅翻譯除了「艾米莉」、「艾米麗」外，竟然仲會彈出「劉慧卿」！由於洋人未必識中文，所以先至會將「劉慧卿」紋喺自己手臂上，如果劇情果真如此，就可以話係「中伏了」。
究竟呢個大隻佬紋上「劉慧卿」三字嘅真正原因係咩？可能連佢都唔知。事關鄭晴隨便上網搜尋，就發現唔少疑似「中伏」例子，有洋人曾經紋過「糞」、「宦官」呢啲中文字，真係嚇到個心離一離。鄭晴都想奉勸大家，紋身好難清除㗎，紋之前，一定要搞清楚自己紋咩啊！
