圖：柯創盛同一班老友喺裕民坊間麥記相聚\大公報記者麥潤田攝
麥記引發集體記憶？原來講緊有30年歷史嘅觀塘裕民坊麥當勞。今個月尾因為觀塘市中心重建都要清拆埋。鄭晴都喺觀塘區出身，覺得好唔捨得。但係唔捨得點止我一個，仲有一班喺觀塘區長大、對呢間「老麥」有感情嘅市民。好似柯創盛都喺度分享，佢話裕民坊間麥記係好多人嘅聚腳點，學生時代鍾意約埋三五知己去嗰度傾下偈！細個嗰時食開心樂園餐，好鍾意儲啲玩具，仲話自己最鍾意隻舊版漢堡神偷，但依家買唔返囉！
觀塘民聯會主席張姚彬就話，裕民坊麥當勞算係香港人集體回憶，亦都係觀塘區地標，逢親市民來到呢區唔識行，都會約係裕民坊度等。裕民坊麥當勞幾十年來就好似歷史印記咁，以往喺呢度發生嘅事，都可能因為重建而煙消雲散，但係一班議員都希望觀塘市中心（K7）重建會保留觀塘特色。
