因衝擊政府總部東翼前地而被判入獄嘅香港眾志秘書長黃之鋒成日以被反對派封為「政治犯」為榮，但佢Facebook專頁尋日發貼提到，佢獄中識咗喺旺角因暴動罪被判監三年嘅麥子晞，仲將對方都形容為「政治犯」。眾所周知，旺角暴動不為任何政治訴求，係純粹嘅暴力行為，有網民就怒斥話，「麥子晞拎枝竹去襲警都叫『政治犯』？」

　　黃之鋒不甘寂寞，仲畫咗張監房平面圖畀眾志擺上Facebook。結果大家發現佢十個圖註入面竟然出現咗四個錯字，包括將廁所寫成「次所」、洗手盆寫成「洗手盤」、儲物箱寫成「儲物廂」，硬板床寫成「硬版床」。生果報尋日就玩煽情，在即時新聞刊登黃之鋒嘅「獄中日記」全文，結果編輯都要忍唔住幫佢改幾個錯字先，除咗「硬版床」再度出現，佢仲將「第一宗」新聞寫成了「第一忠」。黃之鋒唔單止中文唔好，成日走去外國乞援嘅佢英文也麻麻，佢仲要喺日記寫段英文，話「Things can't defeated us can make us stronger.」面對慘不忍睹嘅語法錯誤，生果報就不再出「編按」，而是默默地喺文中直接改成了「Things that can't defeat us will make us stronger.」

　　網民勸好好讀書做少啲錯事

　　另外，尋日黃之鋒出庭時假扮輕鬆，向旁聽人士點頭。及至散庭後就喺犯人欄內向親友叫囂：「下月見」。最後他目光呆滯，由懲教人員押走繼續服刑。佢聲稱還會堅持寫日記，有網民就對黃之鋒好心相勸：「好好讀書，做少啲錯事，寫少啲錯字。」

　　鄭晴