尋日香港打十號風球，不過工黨內部都撞正十號風球喎。話說尋日工黨突然宣布，胡穗珊辭去主席以及退出工黨，工黨執委曾經勉留，但最終尊重佢決定。而家工黨由黨務副主席兼青年部主席趙仕信擔任，直至年底換屆時選出新一任主席。
胡穗珊事後接受傳媒訪問就話，今次退黨係因為黨內有架構問題，喺處事方面非常唔公道，唔合乎一個講公義嘅政黨用嘅手法，加上自己喺黨內長期受到不公平對待，所以退黨係一個抗議喎！佢又話今次退黨唔涉及對工黨路線睇法有意見，當初做主席已經有問題，但諗住睇定啲，但上個月已經惡化到人係可以影響到架構嘅公正性，又話唔關立法會選舉同補選事喎。另外，趙仕信就話，大環境氣氛低迷，打擊就一定有，但只有盡做。
不過，內情又有另一個傳聞。據悉，胡穗珊曾經投訴一位黨員言行，原本紀律委員會就裁定成立，不過後來覆檢就話不作裁決。咁胡穗珊梗係嬲啦！另外呢，呢位黨員同胡穗珊都係咁真性情，言語間就有摩擦，所以矛盾愈積愈深。至於呢位黨員係邊個，有傳就係何秀蘭喎。
