圖：「時新快餐店」暫停營業，隔籬舖老闆呂先生感唏噓/大公報記者楊綺青攝
屹立紅磡逾半世紀、港式漢堡包「始祖」嘅「時新快餐店」，尋日驚傳暫停營業消息，喺Facebook專頁發帖話：「由於需要作出內部調整，在考慮各種因素後，我們決定需暫時停止營業。」粉絲喺網上洗版式發出哀鳴，扁曬嘴喊曬口，擔心又一間滿載香港情懷嘅老店講bye bye，以後食唔到佢哋嘅漢堡包、超脆雞髀，希望舖頭盡快重新開業。
鄭晴尋日特登走去紅磡八嚇，見到時新快餐店「閘已拉」，唔少顧客摸門釘。隔籬舖「聯記川王涼粉」老闆呂先生同鄭晴講，開業10年，同時新快餐店老闆都幾夾，有時啲客幫襯完佢食涼粉，就會幫襯時新食漢堡包、炸雞髀。佢又話，自從港鐵黃埔站開咗，呢條街嘅人流少咗，近期有地產公司嚟收購重建，時新快餐店暫停營業，唔知係咪有關係。而佢自己都唔知可以撐到幾耐。
理大學生施同學尋日去時新快餐店，原本想食雙層芝士漢堡，但失望而回。佢話香港已經愈來愈少呢啲咁有特色嘅舖頭啦！佢好擔心，以後食唔到芝味重、有肉汁勁juicy嘅漢堡扒。
