圖：陳帆局長同羅致光局長夾手幫「坐輪椅」嘅陳恒鑌上新車/大公報記者蔡文豪攝
19座小巴近日紛紛落地投入服務，早前喺網上瘋傳嘅英國製造低地台19座小巴，尋日現真身，不單只比舊款16座小巴多咗三個座位，仲方便輪椅人士乘搭，營辦商「進智公交」預計，最快下月落地，行駛堅尼地城至瑪麗醫院嘅54M路線。
運輸及房屋局局長陳帆、勞工及福利局局長羅致光、多名立法會議員尋日一齊試坐新車。民建聯陳恒鑌更加玩「實測」，坐住輪椅由陳帆局長推上車，試嚇係咪真係咁方便輪椅人士。
低地台小巴由英國廠商Optare製造，車長7.9米，外形呈流線型，車上設有七部閉路電視，方便司機全面監察車內外狀況。19個普通座位外，有輪椅人士專位。
現時小巴只可以載客19人，如果有輪椅人士上車，車上會有一個座位唔可以坐人，民建聯劉國勳話，計劃喺立法會復會後提出修訂，容許低地台小巴以「19+1」方式載客。
立法會航運交通界議員易志明話，低地台小巴每部售價150萬元，較一般小巴貴一倍，所以希望政府資助小巴業界買新車。
