圖：馬會今日將進行馬季前電腦系統測試，各場外投注處是日全線休息一天，市民千祈唔好「大頭蝦」行去投注站/資料圖片
距離新馬季九月初開鑼仲有半個月，雖然尚有六合彩、足球賽事可供下注，但今日也將要全民「戒賭一天」！事關馬會趁馬季抖暑，今日將會進行馬季前電腦系統測試。為咗配合有關測試，各場外投注處是日全線休息一天。至於電話投注、1886電話投注自動服務系統、互動投注服務，今日下晝兩點起都會暫停服務，直至聽日凌晨兩點。
翻查馬會資料，馬會於今、明兩日，分別有11場同23場足球賽事接受投注，其中七場賽事喺聽日凌晨兩點前已開波。換言之，今日Blue Monday（憂鬱星期一）下晝兩點前，有買趁手，否則實等唔切服務重開，隨時「蘇州過後冇艇搭」。
賭波以外，聽日仲會有六合彩攪珠，今次頭獎若然一注獨中，估計高達1600萬元。發達夢當前，鄭晴溫馨提醒各位，今日千祈唔好「大頭蝦」行去投注站，如有查詢，隨時打電話畀馬會顧客服務熱線1817，咁就至穩陣！
鄭晴
