中國人講意頭，運輸署下月三日喺灣仔會展舉行傳統車牌拍賣，其中一個無字頭車牌「9413」諧音「九死一生」，你夠唔夠膽買嚟掛喺自己架車度呢？有業界人士估計，「9413」車牌底價可能高達10萬元，但未必有人承接啦！

　　　　絕處逢生博谷底反彈

　　鄭晴翻查紀錄，呢個「9413」車牌，其實已經第六次出現喺拍賣場上，2001年8月首次推出，無人問津；之後在2002及2004年再次拍賣，底價分別為4.8萬元及9.1萬元，但仍然沒有人出價，直至2009年有市民以底價4.5萬元投得，當日佢仲形容「貪佢夠邪」添，但事隔幾年，唔知點解又放棄咗。由於該車牌無字頭不得轉讓，所以車主放棄嘅話，就要交還運輸署，輾轉喺2012年嘅拍賣會上無人要，直至今次，又再次出現啦！

　　鄭晴同專營車牌轉售嘅優質幸運車牌中心負責人顏文瀚傾過，顏生認為，雖然「9413」聽起來唔吉利，但可能有啲人想買嚟絕處逢生，希望谷底反彈，佢仲估計，呢個車牌底價要10萬元，不過始終係真金白銀，未必有人承接啦！

　　堪輿學家麥玲玲話，中國人講意頭，但各處鄉村各處例，好似4字，喺潮州人眼中，諧音係「喜」，屬好兆頭，而數字代表五行，要夾唔同人命格，所以好難一概而論，不過廣東人嚟講，「九死一生」呢個組合一定有少少心理陰影，始終涉及交通安全嘛，相信廣東人一定唔會吼喎！

　　「9413」未必啱大家，但鄭晴留意到同日仲有HB 8888同GF 333都好好意頭，前者HB意思可以係Happy birthday（生日快樂），加埋「發發發發」，應該會係搶手貨啦！顏生估計，呢個車牌底價最少三萬元，作為生日禮物就最啱啦！