圖：何啟明話譚文豪純粹係夾硬搵啲理由嚟抹黑佢
工聯會立法會議員何啟明最近上載咗幾條短片，實測而家由香港往返廣州係有幾咁唔方便，點知公民黨立法會議員譚文豪就拍片試圖還擊，仲話何啟明硬銷高鐵喎。有過親身體驗嘅何啟明就梗係理直氣壯咁駁返轉頭話，譚文豪條片講嘅所謂理據好薄弱，純粹係夾硬搵啲理由嚟抹黑佢，實在幼稚。
何啟明喺今個月初進行實測，用咗近三個鐘先至由西九龍總站附近嘅柯士甸港鐵站，去到廣州南站；之後佢選擇由廣州東站返柯士甸站，時間就更長，差唔多用咗成四個鐘。不過，譚文豪就拍片質疑廣州南站位置偏僻，又質疑何啟明無向公眾交代，由廣州南站去廣州東站用咗幾長時間喎。
「去廣州唔一定淨去天河區」
何啟明就話，譚文豪嘅「盲點」係覺得「一定要廣州東站先算係廣州嘅市中心」，但廣州明明就好大，「遊客都會沿路去玩啦」，點會將由廣州南站去廣州東站嘅時間都計埋入實測嘅車程？佢又話，去廣州唔一定淨係去天河區，正如去香港都唔一定淨係去中環。
對於譚文豪嘗試由福田站直接買去廣州南站嘅高鐵車飛，何啟明就坦言，呢個係「最落後嘅方法」，「肯定上網預約咗先啦！」
