圖：尋日係「立秋」，天文台錄得最高溫度33℃ 大公報記者林少權攝
尋日係農曆二十四節氣的「立秋」，原本應該係預示炎夏將盡，秋天將至，但香港近排持續熱辣辣，尋日天文台錄得最高溫度33℃，雖然就唔係最熱嘅「立秋」，但熱嘅程度真係拍得住今年「大暑」！「熱夜」之下又有咩好搞作？香港上空尋晚就出現歷時五個鐘嘅「月偏食」，希望你無錯過啦~~~~~
翻查天文台資料，香港自1947年以來，最熱立秋出現喺兩年前，2015年錄得36.3℃，而尋日錄得嘅33℃，雖然有距離，但仍然「熱到一個點」，同今年成為45年來最熱「大暑」錄得嘅33.1℃，只差0.1度咋。事實上，尋日喺赤鱲角、西貢分別錄得35.4℃、35.3℃，打鼓嶺、上水、元朗都超過34℃。
天文台估計，未來一星期氣溫仍然介乎28℃至33℃。怕熱嘅你，聽到可能會失望，但俗語說「秋老虎」會咬人，如果立秋當日無雨落，之後嘅24日就會持續炎熱。尋日「立秋」，朝早落過大雨，莫非係轉涼好預兆？
講番尋晚嘅月偏食，係太空館天象指數評為三粒星嘅天文現象，尋晚11點幾開始，天文台話雖然有啲雲，但無礙觀賞月食。如果錯過咗，唔使灰心，出年一月，有機會睇「月全食」。
