今年係民建聯踏入銀禧大日子，佢哋早前就25周年提出四大新理念，包括傳承愛國愛港、堅守「一國兩制」、實現優質民主、共享發展成果，希望推動社會穩步向前。之但係，呢啲理念抽象過畢卡索啲畫，又有幾多人真係明呢？
民建聯秘書長陳學鋒透露畀鄭晴知，民記已經拍咗一連四集微電影，希望用輕鬆幽默嘅角度，將四大理念用故事形式話畀觀眾聽；每集預計三、四分鐘左右，製作團隊正努力剪片中，相信可以喺下月頭，配合民記喺紅館開騷前「出街」。
政治素人出鏡 耳目一新
唔好睇每集咁短呀，學鋒話，團隊用咗幾日時間拍攝，由劇本、選角到拍攝場地，都有仔細研究過，製作費有六位數，非常認真。佢仲講到，今次特登唔搵出鏡率高嘅民記成員，所有角色都係「政治素人」，希望帶畀觀眾耳目一新感覺。
