圖：Formula E於今年12月2日至3日強勢回歸中環海濱活動空間

　　電動方程式錦標賽（Formula E）繼去年首次殺入香港後，今年12月2日至3日強勢回歸中環海濱活動空間。今年賽事沿用去年長1.86公里嘅賽道，但部分看台票價就加咗，位置至靚嘅添馬公園主看台，單日門票加價500元，每張2880元。點睇至先最抵？鄭晴率先同你格價！

　　香港站作為今屆Formula E賽事新賽季嘅頭炮兼亞洲唯一分站，將首次採用雙賽事制，即係星期六、日分別係兩個獨立比賽日，20位來自十支國際車隊嘅選手同場較勁。Formula Electric Racing（Hong Kong）行政總裁方仁傑話，賽事舊年吸引超過二萬名車迷到場，估計今年有望突破4.1萬人次。

　　E-Village變抽籤免費入場

　　今年賽事有三大主看台，總座位數目由舊年6000幾個，增至今年7400個。票價方面，添馬公園看台門票最貴，成人每張2880元，比舊年貴咗500元。特惠（小童及長者）門票半價。抵唔抵？想睇車手喺髮夾灣過招，呢個位一定無得輸，起碼架賽車轉彎前收嚇油，影相都易啲啦。至於龍和道、中環摩天輪旁呢兩個主看台，票價不變，單日門票2380元。鄭晴覺得，龍和道看台都唔錯，550米大直路睇住啲賽車風馳電掣，但缺點可能喺眨嚇眼，就連車尾燈都睇唔見。

　　鄭晴提提你，大會今年首次推售周末套票（兩日門票），圍起嚟平好多。添馬公園4780元，其餘兩個看台4280元。仲係嫌貴？聽埋先。舊年每張300元嘅「E-Village」門票，大會今年免費派發呀！想攞飛，記得喺9月30日前上ballot.hkformulae.com登記首輪抽籤，第二輪就喺10月31日前登記。

　　鄭晴