大公產品

首頁 > 文章 > 正文

羅智光探班分享音樂減壓法

時間:2017-07-26 03:15:14來源:大公網

  圖:羅智光到公務員培訓處探班,同暑期實習大學生傾偈

  唔講唔知,年近60歲嘅公務員事務局局長羅智光(Joshua),唔單止有豐富嘅公務員經歷,仲係一個音樂人。佢尋日到公務員培訓處探班,同八位就嚟完成暑期實習嘅大學生傾偈,聽到實習生Carman話,曾經幫手搜集減壓良方畀同事參考,就順勢分享佢嘅音樂減壓法,話每逢聽音樂或彈奏電風琴,精神完全集中喺嗜好上,壓力就會不翼而飛。

  局長雖然無即場露番兩手,但鄭晴聽聞,局長除咗識彈鋼琴、拉中提琴,仲識手腳並用彈管風琴,幾年前佢仲喺文化中心嘅管風琴音樂會表演。

  Joshua又同實習生分享自己年輕時嘅留學體驗,想當年,佢喺英國嘅餐館做暑期工「捧餐」,可以單手捧三隻碟,仲學識咗應對唔同要求嘅顧客,尋日仲即場表演佢嘅「捧餐」絕技。Joshua而家身在「熱廚房」做問責官員,政壇上經常面對不同訴求,鄭晴好想知道,局長有無將當年學到嘅應對之法盡情發揮呢?

最新要聞

最新要聞

最受歡迎