圖：林志玲同鹿晗成日都搭高鐵，話唔定大家到時可以見到佢哋

　　高鐵香港段「一地兩檢」方案終於出爐，市民好快就可以極速連接中國各地城市。為咗令更多人了解高鐵香港段運作，政府新聞處尋日喺Facebook推出新片，用卡通話你聽「一地兩檢」到底係咩，除咗邊度上車外，仲話埋你知喺香港上車抵達目的地後，唔使再做任何通關程序，既方便又快捷，外交部駐港特派員公署嘅Facebook專頁都有轉發呀。

　　分分鐘快過搭飛機

　　港區全國人大代表、香港中國旅行社榮譽董事長盧瑞安話，由南京去上海、深圳去潮汕等等，都唔知搭過幾多次高鐵，大讚列車穩定舒服，每卡都有服務員照顧乘客需要，如果去短中途旅行，分分鐘快過搭飛機。佢話而家好多旅行社都搞高鐵團，相信高鐵旅遊會係未來新潮流，「『一地兩檢』便利旅客，係百利無害嘅惠民措施，希望『泛民』唔好節外生枝，令方案可以快啲實施啦！」

　　旅遊界立法會議員姚思榮就估計，可能擔心初期運作有混亂，所以暫時只能夠喺西九龍總站用實名制買飛，但相信運作暢順後，香港市民好快就可以好似內地同胞咁，上網買飛，到時去經商旅遊，一定更方便。

　　其實，唔少大明星都鍾意搭高鐵穿州過省，例如名模林志玲，經常喺微博分享佢坐高鐵嘅相，話貪佢唔似飛機經常Delay，佢仲試過特登坐高鐵，只為去其他城市食宵夜添！人稱「高鐵小王子」嘅超人氣偶像鹿晗，更加係高鐵常客，無論工作定去玩，都一定坐高鐵唔坐飛機。鄭晴不禁FF，幻想高鐵開通後，喺舒服嘅列車入面，撞到志玲姐姐同鹿哥落嚟香港玩！