圖：林鄭月娥與年輕人一起參觀香港書展\大公報記者林良堅攝

　　香港書展係年度盛事，行政長官林鄭月娥（Carrie）尋日都有應邀去書展，出席青年協會活動，同一班年輕人行書展。Carrie過往係書展常客，差唔多年年都帶埋兩個囝囝去書展，但近年工作繁忙，佢話已經三年無去過書展。

　　綽號「好打得」，作風硬朗嘅Carrie，平時睇咩書呢？佢尋日同一齊行書展嘅年輕人傾偈時透露，「好似公仔書、小說，十幾歲女仔鍾意睇嘅瓊瑤、亦舒寫嘅小說，我都有睇，不過近年因為公務繁重，好少睇呢類比較輕鬆嘅書。」

　　要控制血糖少食甜品

　　Carrie十幾年前任職社署署長時，放工後鍾意返屋企煮兩味畀屋企人食，原來當年佢有從烹飪書偷師。Carrie曾經擁有過好多本烹飪書，覺得佢哋「色香味俱全」，而且好實用，一般書上提到嘅材料，都好易買到，佢話以前行書展，其中一個主要停留嘅地方，就係賣烹飪書嘅攤位。

　　一位女仔喺分享圖書時，送咗一本教整布丁嘅烹飪書畀Carrie，Carrie話自己因為要控制血糖，近年已經好少食甜品，但佢都會整畀囝囝食。

　　Carrie亦帶咗自己嘅兩本書嚟同返年輕人分享，分別係佢任職社署時寫嘅《署長隨筆》，同競選期間推出嘅文宣小冊子。前者由於已經絕版而無送到畀年輕人，但就喺13本小冊子上親筆簽名送畀佢哋，鄭晴我都好想要啊！