尋日立法會議事殿堂上演咗一場「罵街」戰，民主黨議員黃碧雲與民建聯劉國勳互片近五分鐘，仲搞到委員會主席廖長江都束手無策，最後要被迫中途宣布休會添！

　　事緣尋日政制PANEL上，民主黨議員黃碧雲臨時提出要喺會議最後討論其他事項時，詢問政制及內地事務局局長聶德權六個議席懸空嘅事，逼局長答佢到底會唔會分開補選，即使廖長江多次提醒問題同議程無關，黃碧雲都繼續不理會。

　　民建聯劉國勳睇唔過眼，話不明白點解咁要急於詢問補選問題，法庭DQ四位議員資格都只不過啱啱發生，連上訴與否都未知，但民主黨咁快對補選虎視眈眈。雖然無指名道姓，但黃碧雲聽完就自動「對號入座」，大鬧劉國勳猜測佢發言動機，劉國勳反駁話，「我講緊民主黨啫，又唔係一定講你。」叫黃唔好睇得自己咁大。

　　廖長江就作出裁決，根據議事規則劉國勳並無指明個別議員，唔算有猜測議員動機，不過「一舊雲」梗係聽唔入耳啦，猛指住廖長江嚟鬧，仲話「民主黨抗議民建聯呢個『躝癱』隨便含沙影射民主黨。」劉國勳當場只能笑着搖頭，形容黃碧雲行為就如潑婦，但言論隨即惹起對方反彈，搞到佢不停喺座位上叫囂，劉國勳主動收回言論，「我收回啦主席，我唔想同呢啲女人鬥。」之不過「一舊雲」似乎無停戰嘅意思，批評劉國勳侮辱女性，結果要廖長江提早五分鐘休會，先結束呢場戰事。

　　鄭晴