大公網7月13日訊 記者龔學鳴報道：今屆立法會會期即將完結，一班議員就送食物慰勞一班記者行家。民建聯主席李慧琼率領一班民記議員，帶住大約十盒西餅去到議事廳走廊。Starry就話，過去一年非常辛苦大家，星期六會見到行家們，日日都見到，所以向大家送上小小心意。EQ話，見記者嘅時間仲多過屋企人，知道大家都辛苦，呢一年又多會議，以及開會時間好長，希望下屆會期順暢啲，少啲拉布，多啲做實事。Steven就話，大家都係戰友，係立法會共同戰鬥，不過佢又向記者行家耍冧，話可能因為行程緊迫，未必能夠即時回應行家嘅提問，所以希望「小小心意，聊以慰藉」。
大家食完西餅，跟住經民聯梁美芬同一班助理就帶住幾盒水果送畀大家。梁博士話，呢啲水果係即刻喺果欄買架，保證新鮮。鄭晴望過，啲水果真係好新鮮，除咗車厘子，仲有三款提子，包括「晴王」、「香印」同埋「巨峰」。梁博士話，喺果欄買一嚟想振興本土經濟，另一方面就係知道今年會期成日拉布，呢啲水果充滿維他命C，大家可以補補喎。
