大公網7月4日訊（記者 龔學鳴）17世紀初嘅噴泉銅像「撒尿小童」係比利時布魯塞爾最具代表性嘅市標。呢個「小朋友」響當地時間6月30日換上香港服裝一日，搖身一變成為「潮童」，作為慶祝香港回歸祖國，以及香港特別行政區成立20周年嘅慶祝活動之一，吸引唔少當地人影相留念。

　　「撒尿小童」着住嘅香港服裝，係由香港駐布魯塞爾經濟貿易辦事處於2012年贈予布魯塞爾市，旨在向大眾傳達一個正面信息，香港係一個秉承中國傳統文化嘅現代化都會。呢套衫嘅設計融合咗突顯香港中西匯萃嘅特徵，配有香港特區飛龍圖案及彩色絲帶嘅黑色中式上衣，搭配一條時髦嘅黑色牛仔褲，襯上白色鞋帶嘅紅色鞋。另外，套衫仲包括一副象徵科技驅動現代城市生活嘅平板電腦添。

　　唔講唔知，原來「撒尿小童」一年內會響指定日子總共裝扮130次，亦會經常收到新衫。「撒尿小童」嘅「衣櫃」設於布魯塞爾市博物館嘅專設大樓內，至今已經擁有超過900套衫。「撒尿小童」上一次着呢套香港服裝，係時任商務及經濟發展局局長蘇錦樑響2015年10月訪問布魯塞爾期間。

　　布魯塞爾17世紀初的噴泉雕像和市標——「撒尿小童」穿上香港服裝，作為慶祝香港回歸祖國及香港特別行政區成立二十周年慶祝活動的一部分。