圖：六位前局長開金口向大家致謝\田北辰fb圖
早排一套劇集令到《陪着你走》呢首舊歌再度紅返，估唔到已經卸任嘅局長都幾熟呢首歌，仲唱得幾好添！
港鐵主席馬時亨前晚擺咗十圍，歡送六位前局長，包括高永文、張雲正、譚志源（Raymond）、蘇錦樑（Greg）、陳家強（KC）同埋張炳良。呢六位前局長當晚高歌一曲《陪着你走》，答謝大家。Greg蘇首先唱一句，熱一熱身，之後其他前局長跟住唱。唱到中段，現場觀眾向一班前局長獻花添！阿Greg真係好投入，又同KC搭膊頭，仲同Raymond你眼望我眼，去到最後更加拗腰飆高音，真係去到忘我境界呢！
除咗前局長獻唱，一班立法會議員同前立法會議員，都有唱返首《輪流轉》回敬，包括立法會主席梁君彥、經民聯主席盧偉國、副主席林健鋒、前立法會主席曾鈺成、財委會主席陳健波，仲有「田氏兄弟」田北俊田北辰添。田北辰話，選呢首歌，就係因為新政府又係新嘅一次輪流轉，希望同各位新局長辯論之餘，台下可飲返杯喎！不過呢，田北俊就只係打拍子，無開金口，田北辰解釋，台下嘉賓有「歌神」張學友，所以阿哥唔想班門弄斧喎！
